day,
00
month
0000
துரோகம் செய்து
முதுகில் குத்தும்
வேலை செய்பவன் அவன்
அதற்காகவே மெனக்கெடும்
அவன் மூளைக்குள்
சூழ்ச்சிக் கூவம் வற்றுவதேயில்லை
குப்புறத் தள்ளுவதிலும்
குழி பறிப்பதிலும்
உலக சாதனையாளன்
என்பதை விடவும்
மகா நடிப்பு சுதேசி
நம்பிக்கை
கொலை செய்யும்
இடியாப்பச் சிக்கலே அவன்
எப்போதும்
சகுனி விடியல்தான்
அவனுக்கு
அமரர் ஊர்வலங்களே
பாயசம்
நீலப் படத்தின் சுவாரஸ்யத்தோடு
பாடையைப் பார்ப்பவன்
துரோகப் பொழுதில்
மனைவியின் விரலை
நீவியிருக்கலாம்
மகளின் கேசத்தைக்
கோதியிருக்கலாம்
குடும்பத்தின் புன்னகைக்கு
ஒரு செடியாவது
நட்டிருக்கலாம்
இப்போது
அவன் வீட்டு நிலைவாசலாகி நிற்கிறது
தர்மத்தின்
ரௌத்திர சாபம்
எப்போதும் மிச்சமிருக்கும்
சுவாசக் காற்றும்
-ஆண்டாள் பிரியதர்ஷினி
